Hopp til hovedinnhold
Created by potrace 1.11, written by Peter Selinger 2001-2013
Søk på oslomet.no
  • Studier
  • Forskningen vår
  • Samarbeid
  • Universitetsbiblioteket
  • Om OsloMet
  • Kontakt oss
  • For studenter
  1. OsloMet
  2. ...Mellomliggende nivåer er skjult
  3. Forskningsnyheter
  4. Låg inntekt? Slik kan du få råd til eigen bustad

Låg inntekt? Slik kan du få råd til eigen bustad

Ordningar som gjer det mogleg å kjøpa bustad med lite eigenkapital kan gje håp til folk med låg inntekt. Ein ny rapport viser at moglegheitene er store – viss kommunane grip sjansen.

To personar står på bustadvising i ei lys leilegheit og ser på eit salsprospekt. I rommet er det moderne kjøkken, eit lite bord og veggkunst med sommarfuglar.
Foto: Berit Roald / NTB

Forskningsartikkel av: By- og regionforskningsinstituttet NIBR

Publisert: 23.01.2026Sist oppdatert: 12.11.2026
Kristin Horn Talgø

Kort oppsummert

  • Bustadkjøpsmodellar som del-eige og leige-til-eige kan gje husstandar med låg inntekt ein reell moglegheit til å bli bustadeigarar.
  • Rapporten viser geografiske skilnader, men at slike modellar kan opna bustadmarknaden – særleg i kommunar med høge prisar.
  • For at ordningane skal fungera i praksis, må kommunane samarbeida tettare med bustadutviklarar.

Kort oppsummert er laga ved hjelp av Copilot. Teksten er kvalitetssikra av OsloMet.

Langtidsleigetakarar med låg inntekt har i dag svært små sjansar til å kjøpa bustad. Ein ny rapport frå By- og regionforskingsinstituttet NIBR ved OsloMet viser at ulike bustadkjøpsmodellar kan hjelpa fleire inn på bustadmarknaden.

– Moglegheitene for folk med låg inntekt er no svært små. Bustadkjøpsmodellar kan opna dører til område som elles er utanfor rekkevidde, seier Berit Nordahl.

Ho er prosjektleiar for rapporten.

Kva er bustadkjøpsmodellar?

Bustadkjøpsmodellar gjer det mogleg å kjøpa bustad med lite eigenkapital. Dei vanlegaste er:

  • Del-eige: Du kjøper ein del av bustaden og leiger resten. Etter kvart kan du kjøpa meir, til du eig heile bustaden.
  • Leige-til-eige: Du leiger først og kan kjøpa seinare. Eigenkapital blir bygd opp gjennom sparing og eventuell prisvekst.

– Målet er at fleire skal kunna eiga bustad og styrkja økonomien sin over tid, seier Nordahl.

Store skilnader mellom kommunane

Rapporten ser på tre kommunar: Moss, Arendal og Kristiansand. Han viser korleis modellane kan nyttast i det bustadsosiale arbeidet.

  • Kristiansand: Husstandar med låg inntekt kan i dag berre kjøpa 2,1 prosent av bustadene som er til sals. Med bustadkjøpsmodellar aukar moglegheitene mykje – særleg for nye bustader.
  • Arendal: Lågare prisar gjev eit betre utgangspunkt. Rundt 20 prosent av bustadene er innan rekkevidde. Samstundes kan modellane bidra til større geografisk spreiing i kvar folk bur.
  • Moss: Høge prisar gjer marknaden vanskeleg. Berre 5,6 prosent av bustadene er innan rekkevidde for husstandar med låg inntekt. Her kan modellane bli avgjerande.

– Bustadkjøpsmodellar kan gje husstandane mykje større valfridom i kvar dei bur. Det er viktig for å unngå at vanskelegstilte samlar seg i nokre få område, seier Nordahl.

Kommunane må gå frå intensjon til handling

Alle dei tre kommunane ser at bustadkjøpsmodellar kan vera nyttige, men ingen har enno laga ein konkret plan for korleis dei skal ta dei i bruk. Skal dei gå frå gode intensjonar til faktisk gjennomføring, må kommunane samarbeida tettare med lokale bustadutviklarar, seier Nordahl.

– Når fleire får moglegheit til å kjøpa nye bustader gjennom slike ordningar, kan det òg bidra til at utbyggjarar kjem raskare i gang med prosjekta sine, utdjupar ho. Ho legg til:

– Kommunane har gjort eit godt arbeid med å identifisera utfordringane sine, men dei veit framleis ikkje korleis dei skal nytta bustadkjøpsmodellane i praksis.

Kan bli eit viktig verktøy

Rapporten viser at det finst fleire konkrete måtar å samarbeida med bustadutviklarar på. Mellom anna vurderer ein av kommunane å kombinera ein bustadkjøpsmodell med startlån for å betra situasjonen for langtidsleigetakarar, og andre med låg eller inga eigenkapital og låge inntekter.

I mange europeiske land er ordningar med bustadkjøpsmodellar heilt vanlege. I Noreg er dei framleis nye og blir rekna som innovative. Bustadbyggjelaga har gått føre, og fleire aktørar utviklar no modellar i samarbeid med kommunane.

Bustadkjøpsmodellar kan difor bli eit viktig verktøy for å hjelpa unge og langtidsleigetakarar med låg inntekt inn på bustadmarknaden.

Rapporten er finansiert av Husbanken (nva.sikt.no).

Kontakt

  • Berit Irene Nordahl

    Berit Irene Nordahl

    • forsker emeritus
    • +47 672 37 850

Relaterte saker

  • Luftfoto av et boligområde omgitt av skog, med flere blokker, rekkehus med røde tak og noen frittstående hus i forgrunnen
    • By, regioner og urbanitet

    Analyse av 10.000 boligsalg: Slik kan rolige områder beskytte boligverdien

    Visste du at en park like ved boligen din kan nulle ut verdifallet fra trafikkstøy? Det har forskere funnet i en ny analyse av boligsalg.

  • En inngangsdør åpner inn en ren, tom leilighet med utsikt mot en bygård.
    • By, regioner og urbanitet

    Slik kan vi få flere leieboliger

    Mange kommuner mangler leieboliger, og leiemarkedet er presset. Forskere ved OsloMet har undersøkt status på leiemarkedet i Norge, og foreslår tiltak som kan gi flere leieboliger.

  • Boligkvartal i en by med fargerike murhus sett på skrå ovenfra
    • By, regioner og urbanitet

    Ni måter vi kan få fart på boligbyggingen

    Bak nye boliger ligger i snitt tre år med saksbehandling. OsloMet-forskere har ni forslag til hvordan tiden kan kortes ned så boligbyggingen kan ta seg opp.

Flere forskningsnyheter

Forskningsartikkel av: By- og regionforskningsinstituttet NIBR

Publisert: 23.01.2026Sist oppdatert: 12.11.2026
Kristin Horn Talgø

OSLO METROPOLITAN UNIVERSITY
STORBYUNIVERSITETET

Postboks 4, St. Olavs plass
0130 Oslo
Tlf.: 67 23 50 00

Kontakt oss

  • Facebook
  • LinkedIn
  • Instagram
  • English
  • Alumni
  • Ansattoversikt
  • Arrangementsoversikt
  • For ansatte
  • For studenter
  • Ledige stillinger
  • Personvernerklæring og informasjonskapslar
  • Pressekontakt
  • Tilgjengelegheitserklæring

Moglegheitene for folk med låg inntekt er no svært små. Bustadkjøpsmodellar kan opna dører til område som elles er utanfor rekkevidde.

Berit Nordahl
Portrettbilete av forskar Berit Nordahl som ser i kamera og smiler.